Psa 21 | NdeIBE | STEP | Kumqondisi wokuhlabela. Ihubo likaDavida Yebo Jehova, umbusi uyathokoza ngamandla avela kuwe. Kukhulu ukuthokoza kwakhe ngokunqoba akuphiwa nguwe!

Psalms 21

1 Yebo Jehova, umbusi uyathokoza ngamandla avela kuwe. Kukhulu ukuthokoza kwakhe ngokunqoba akuphiwa nguwe!

2 Usumphile isiloyiso senhliziyo yakhe njalo kawumncitshanga isicelo sezindebe zakhe.

3 Wamemukela ngezibusiso ezinhle wamethesa umqhele wegolide elicengekileyo ekhanda lakhe.

4 Wacela kuwe ukusila, wamupha ubude bezinsuku kuze kube nini lanini.

5 Ngokunqoba akuphiwe nguwe, lukhulu udumo lwakhe; usumgqizise inkazimulo lobukhosi.

6 Ngempela usumuphe izibusiso zanininini wamenza wajabula ngentokozo yobukhona bakho.

7 Ngokuba umbusi uyamthemba uJehova; ngothando loPhezukonke olungaphuthiyo akayikuzanyazanyiswa.

8 Isandla sakho sizazibamba zonke izitha zakho; isandla sakho sokunene sizabaxhakalaza abakuzondayo.

9 Kuzakuthi lapho uqhamuka wena uzabenza babe njengomlilo wemvutho enkulu. Ngenxa yentukuthelo yakhe uJehova uzabaginya, umlilo wakhe uzabaqothula.

10 Wena uzabhubhisa izizukulwane zabo emhlabeni, inzalo yabo ebantwini.

11 Loba beceba okubi ngawe besakha amaqhinga amabi, bangeke baphumelele;

12 ngokuba uzabenza bafulathele babaleke nxa usubakhombela usulinwebile idandila.

13 Mawuphakanyiswe, O Jehova, ngamandla akho; sizahlabela sibabaze amandla akho.